Apple yeni məhsulu olan “Ultra” seriyasını yalnız bir neçə modellə məhdudlaşdırmayacaq, onu tamamilə yeni və premium məhsul kateqoriyasına çevirəcək. 

Tvit.az xarici mediaya istinadən xəbər verir ki, “Ultra” adı sadəcə model əlavəsi deyil, ayrıca məhsul sinfi kimi təqdim olunacaq. İlk addım isə bu payız təqdimatı gözlənilən qatlanan iPhone ilə atılacaq.

Sənayedə uzun müddətdir gündəmdə olan qatlanan iPhone layihəsinin inkişafında Apple artıq mühüm mərhələyə çatıb. Bir çoxları cihazın “iPhone Fold” adlanacağını gözləsə də, onun bazara iPhone Ultra adı ilə çıxacağı iddia edilir.

Yeni model mövcud Pro seriyasını əvəz etməyəcək. Əksinə, məhsul xəttində daha yüksək səviyyəli, daha bahalı və daha iddialı alternativ kimi yer alacaq. Beləliklə, “Ultra” etiketi şirkətin ən qabaqcıl və güclü cihazlarını ifadə edəcək.

İkinci məhsul isə MacBook Ultra modelidir. Bildirilir ki, Apple OLED ekran və toxunma funksiyalarına malik yeni noutbuk üzərində çalışır və bu cihazın məhz həmin ad altında təqdim olunması gözlənilir.

Gözləntilərə görə, yeni model hazırkı MacBook Pro seriyasından daha yüksək qiymətə satışa çıxarılacaq və tamamilə yeni funksiyalar təqdim edəcək. Bununla da Apple Pro seriyasını daha əlçatan seqmentdə saxlayacaq, “Ultra” brendini isə texnologiyanın zirvəsi kimi mövqeləndirəcək.

Aysel Şirinova