​Cənubi Koreyanın texnologiya nəhəngi "Samsung Electronics"in səhmləri rekord gəlir göstəriciləri və investorların süni intellekt sektoruna artan marağı fonunda kəskin bahalaşaraq şirkətin bazar dəyərini 1 trilyon dollarlıq həddin üzərinə daşıyıb.

​Tvit.az xarici mediaya istinadən xəbər verir ki, "Samsung"un səhmləri mayın 6-na olan məlumata görə 15% artım nümayiş etdirib. Bu sıçrayış nəticəsində şirkət TSMC-dən sonra 1 trilyon dollar limitini keçən ikinci Asiya nəhəngi olub.

​“Süni intellekt dəliliyi şirkətin rekord gəliri ilə birlikdə səhmlərin qiymətini kəskin şəkildə artırıb. İnvestorların süni intellektlə əlaqəli aktivlərə axın etməsi səhmləri rekord həddə çatdırıb və indiyə qədər qeydə alınan ən böyük birgünlük qazanc əldə edilib”, - deyə maliyyə hesabatlarında qeyd olunub.

​Məlumata görə, bu artım şirkətin birinci rüb üzrə maliyyə nəticələrini açıqlamasından sonra baş verib. "Samsung"un əməliyyat mənfəəti səkkiz dəfədən çox artaraq 39 milyard dollara, ümumi gəlirləri isə rekord həddə — 89,96 milyard dollara çatıb. Qeyd edək ki, texnologiya nəhəngi 1 trilyonluq həddi ilk dəfə 26 fevral 2026-cı ildə keçib.

Aysel Şirinova