​Qlobal planşet bazarında rəqabət mühiti və satış göstəriciləri yenidən formalaşıb. "Omdia" tədqiqat şirkətinin yayımladığı son hesabata əsasən, 2026-cı ilin ilk rübündə planşet satışlarında cüzi artım müşahidə olunsa da, "Apple" şirkətinin bazardakı dominantlığı sarsılmaz olaraq qalır.

​Tvit.az xarici mediaya istinadən xəbər verir ki, 2026-cı ilin birinci rübündə dünya miqyasında ümumilikdə 37 milyon planşet satılıb. Bu rəqəm ötən ilin müvafiq dövrü ilə müqayisədə 0,1% artım deməkdir. Regional baxımdan ən yüksək satış göstəriciləri Latın Amerikası, Yaxın Şərq və Afrika bölgələrində qeydə alınıb.

​“Apple bir brend kimi bazarda böyük üstünlüyünü davam etdirir. Şirkət üç ay ərzində 14,8 milyon iPad sataraq qlobal bazarın 40,1%-nə sahib olub. Yeni iPad modellərinin satışa çıxarılması illik müqayisədə 7,9%-lik artıma birbaşa təsir göstərib”, - deyə hesabatda qeyd olunub.

​Məlumata görə, 2026-cı ilin ilk üç ayında ən çox satış edən brendlərin sıralaması belədir:

​Apple: 14,8 milyon (40,1%)

​Samsung: 5,7 milyon (15,7%)

​Huawei: 3,2 milyon (8,8%)

​Lenovo: 3,045 milyon (8,2%)

​Xiaomi: 2,6 milyon (7,2%)

​Ekspertlər bildirir ki, "Apple" uzun illərdir iPad modelləri ilə bazarda ciddi rəqib tanımır və 40%-lik bazar payı şirkətin texnoloji üstünlüyünün göstəricisidir. Digər brendlər isə ümumilikdə 7,4 milyonluq satışla bazarın 20,1%-ni bölüşürlər.

Aysel Şirinova