Kivinin tərkibindəki yüksək serotonin konsentrasiyası orqanizmdə melatonin ifrazına birbaşa təsir göstərir. Məhz bu xüsusiyyətinə görə meyvə somnoloqların tövsiyələrində ön sıralarda yer alır.

Tvit.az "The Mirror" nəşrinə istinadən xəbər verir ki, yatmazdan əvvəl müntəzəm olaraq kivi yemək yuxusuzluqla mübarizədə effektiv vasitədir.

Bir ay davam edən təcrübə göstərib ki, yatmazdan bir saat əvvəl iki kivi yemək yuxuya getmə müddətini qısaldır. Təcrübə iştirakçıları gecə daha az oyanıb, səhərlər isə özlərini daha gümrah hiss ediblər. Kivi yuxu keyfiyyətini yaxşılaşdırmaqla yanaşı, orqanizmdə kortizolun səviyyəsini də aşağı salmağa kömək edir.

Qastroenteroloq Sergey Danilov Pravda.ru-ya verdiyi açıqlamada bildirib ki, "Bir gecədə möcüzə gözləməyin. Kumulyativ (toplanan) effekt yalnız 2-4 həftəlik sistemli istifadədən sonra müşahidə olunur".

Həkim-endokrinoloq Yekaterina Orlova isə əlavə edib ki, kivi maddələr mübadiləsinin normallaşdırılmasında əla vasitədir. Meyvə qanda şəkərin səviyyəsində kəskin dəyişikliklərə səbəb olmadığı üçün aclıq hissi ilə bağlı gecə oyanmalarının qarşısını alır.