Böyük Britaniya hökuməti koronavirus pandemiyasına qarşı tədbirlər zamanı vergi ödəyicilərinin təqribən 13 milyard dollar vəsaitini səmərəsiz istifadə edib.

Tvit.az xəbər verir ki, bu barədə BBC məlumat yayıb.

Bildirilib ki, COVID-19 pandemiyası dövründə Nazirlər Kabinetinin işini öyrənən xüsusi istintaq komissiyası belə bir nəticəyə gəlib.

2020-ci ilin yanvar ayı ilə 2022-ci ilin iyun ayı aralığında qoruyucu ləvazimatlar, test dəstləri və süni tənəffüs aparatları üçün hökumətin çəkdiyi ümumi xərclər 54.6 milyard dolları ötüb. Həmin məbləğin təqribən 13 milyard dolları istifadəyə yararsız və ya vaxtı keçmiş avadanlıqlara sərf olunub.

Heç zaman istifadə edilməyən avadanlıqların alınmasına əlavə olaraq 204 milyon dollar, kütləvi istehsalına heç vaxt başlanılmayan süni tənəffüs aparatlarının layihələndirilməsinə isə 186 milyon dollar yönəldilib.

Sənəddə həmçinin qeyd edilir ki, infeksiyanın yayıldığı ilk dövrlərdə dövlətin kifayət edəcək qədər tibbi maska, xalat və əlcək bazası mövcud olmayıb, eyni zamanda ölkə onların qlobal miqyasda tədarükü uğrunda rəqabətə tab gətirə bilməyib.

Komissiya rəhbərinin sözlərinə görə, səlahiyyətli şəxslər siyasi əlaqələrə malik tədarükçülərə üstünlük verən xüsusi "VIP-xətt" formalaşdırıblar. O vurğulayıb ki, mövcud sistem təxirəsalınmaz dövlət satınalmalarında ədalətsizliyə yol açıb və vətəndaşların etibarını zədələyib.